இலங்கையிலுள்ள மூல வளங்களுள் சூழலோடு இசைந்த கைத்தொழில்களுக்கு மக்களால் அதிக பயன்பாட்டுக்கு உள்ளீர்க்கப்பட்ட மூலவளமாக பனைவளம் காணப்படுகின்றது. இதன் பழத்திலிருந்து பெறப்படும் பனங்களியிலான பனாட்டு, பதநீரிலிருந்து பெறப்படும் பனைவெல்லம், பனையோலையினால் பின்னப்படும் பெட்டி, பாய், கடகம் மற்றும் பனை மரத் தளபாடங்கள் போன்றவை அன்றிலிருந்து இன்றுவரை விரும்பி உண்ணப்பட்டும், அத்தியவசிய பாவனைக்கு உட்படுத்தப்பட்டும் வருகின்றது.

சிங்கைநகர் கிராமத்தில் விரிவாக்கல் பகுதியினால் 30 யுவதிகளுக்கு பனைசார் உணவு பயிற்சியும், தரச்சான்றிதழ் பெறுவதற்கு உரிய நடைமுறைகள் என்ற தலைப்பிலான கருத்தரங்கும், உற்பத்திப்பகுதியினால்  பனை வெல்லத்துடன் பிரதேச தானியங்களும் சேர்த்த, ஊட்டமிகு உணவு உற்பத்தி செய்முறைகளும் சிங்கைநகர் விடிவெள்ளி மாதர் மன்ற கட்டிடத்தில் நடைபெற்றது. இதன் வளவாளர்களாக பனை ஆராய்ச்சி நிறுவனத்தின் ஆராய்ச்சி உத்தியோத்தர் திருமதி மேரி, ஆராய்ச்சி உதவியாளர் செல்வி கிளனிஸ்டா, உற்பத்தி பகுதியிலிருந்து திரு. க.சுதாகரன் ஆகியோரும் கலந்து சிறப்பித்தனர்.

கணினி பொறி மூலம் காணொளியூடாக விளக்கங்களும், பனைசார் உணவு செய்முறையும் விரிவாக்கல் முகாமையாளர் திரு.கா.கோபாலகிருஷ்ணன் அவர்களின் முன்னெடுப்பில்  நிகழ்த்தி காட்டப்பட்டன.

இச் செயற்பாடினால் பயிற்றப்பட்ட பனைவெல்ல எள்ளுப்பாகு, சிறுபயறு பனைவெல்லம், இஞ்சி பனைவெல்லம், எள்ளுப் பனைவெல்லம் என்பன சிறப்பாக தயாரிக்கப்பட்டன. இப் பயிற்சி பெற்ற பெண்கள் குழுக்களாக இவ் உற்பத்தியினை மேற்கொள்ள உள்ளனர்.

வட வரணி பனங்கைப்பணியாளருக்கான விசேட தொழில்நுட்ப பயிற்சி 2018.04.04ம் திகதியன்று வளவாளராக திருமதி. பவானி தங்கத்துரை அவர்களால் பனைசார் துறையில் வாழ்வாதாரத்தை நம்பி வாழும் பெண்கள் தலைமைத்துவ குடும்ப உறுப்பினர்கள் 23 பேருக்கு பயிற்சிக்கான விரிவுரை வழங்கப்பட்டது.

மேலும், இந்நிகழ்வினை தொடர்ந்து விரிவாக்கல் முகாமையாளர் திரு. கா. கோபாலகிருஷ்ணன் அவர்களால் பனைசார் உற்பத்தியாளர் சங்கம் அங்குரார்ப்பணம் செய்யப்பட்டதுடன், இச்சங்கத்தில் பனைசார் உற்பத்திகளுக்கான பயிற்சிகள் வழங்கப்படுமெனவும், இதன் மூலம் மேற்கொள்ளப்படும் தரமான உற்பத்திகளுக்கு சந்தை வாய்ப்பினை சபையினால் ஏற்படுத்தி தரப்படுமெனவும் தெரிவிக்கப்பட்டமை இங்கு குறிப்பிடத்தக்க விடயமாகும்.